ஐபோன் 16 சீரிஸ், வாட்ச் சீரிஸ் 10, ஏர்பாட்ஸ் மேக்ஸ்.. இன்று வெளியாகவிருக்கும் ஆப்பிள் சாதனங்கள்!

ஆப்பிள் நிறுவனமானது இந்தாண்டிற்கான ஐபோன் வெளியீட்டு நிகழ்வாக It’s Glowtime நிகழ்வை இன்று நடத்துகிறது. இந்த நிகழ்வில் ஐபோன் 16 சீரிஸ் ஸ்மார்ட்போன்கள் உட்பட பல்வேறு சாதனங்களை வெளியிடவிருக்கிறது அந்நிறுவனம். 

 

 

இன்று தங்களுடைய புதிய ஸ்மார்ட்போன் சீரிஸான ஐபோன் 16 சீரிஸை வெளியிடுகிறது ஆப்பிள். ‘it’s Glowtime’ என்ற நிகழ்வின் மூலம் புதிய ஸ்மார்ட்போன்கள் மற்றும் பிற கேட்ஜட்களை வெளியிடுகிறது அந்நிறுவனம். இன்றைய நிகழ்வில் ஆப்பிள் என்னென்ன சாதனங்களை எல்லாம் வெளியிடவிருக்கிறது? எத்தனை மணிக்குத் தொடங்குகிறது இந்த நிகழ்வு? எப்படி இந்த நிகழ்வைப் பார்ப்பது?

 

ஆப்பிளின் Its Glowtime நிகழ்வு:

 

புதிய ஐபோன்களை வெளியிடும் ஆப்பிளின் ‘It’s Glowtime’ நிகழ்வானது, இந்திய நேரப்படி இன்று (செப்டம்பர் 9) இரவு 10.30 மணிக்குத் தொடங்குகிறது. இந்த நிகழ்வானது அமெரிக்காவில் உள்ள ஆப்பிளின் தலைமையகத்தில் நடக்கிறது. இந்த நிகழ்வை உலகமெங்கும் இருப்பவர்கள் நேரலையிலும் காண முடியும். ஆப்பிளின் அதிகாரப்பூர்வ வலைத்தளப் பக்கத்திலும், ஆப்பிளின் சமூக வலைத்தளப் பக்கங்களிலும் இந்த நிகழ்வை நேரலையில் காணலாம்.

 

என்னென்ன சாதனங்கள் வெளியாகின்றன?

 

இன்றைய ஆப்பிள் நிகழ்வின் முதன்மையான வெளியீடு ஐபோன் 16 சீரிஸ் தான். இந்த சீரிஸின் கீழ் ஐபோன் 16, ஐபோன் 16 பிளஸ், ஐபோன் 16 ப்ரோ மற்றும் ஐபோன் 16 ப்ரோ மேக்ஸ் ஆகிய நான்கு ஸ்மார்ட்போன்களை வெளியிடுகிறது ஆப்பிள்.

இதனைத் தவிர்த்து, ஆப்பிள் வாட்ச் X, ஆப்பிள் வாட்ச் சீரிஸ் 10, ஆப்பிள் வாட்ச் அல்ட்ரா 3 மற்றும் ஆப்பிள் வாட்ச் SE 3 ஆகிய நான்கு ஸ்மார்ட்வாட்ச்களையும் ஆப்பிள் வெளியிடும் என எதிர்பார்க்கப்படுகிறது.

புதிய ஏர்பாட்ஸ் ஒன்றையும் இன்றைய நிகழ்வில் ஆப்பிள் வெளியிடவிருக்கிறது. இத்துடன் ஏர்பாட்ஸ் ப்ரோ மாடல் ஒன்று கூடுதலாக வெளியிடப்படலாம் என எதிர்பார்க்கப்படுகிறது.

 

புதிய சாஃப்ட்வேர் அப்டேட்கள்:

 

ஆப்பிளின் பல்வேறு சாதனங்களுக்கான அடுத்த தலைமுறை சாஃப்ட்வேர் அப்டேட்கள் பயனாளர்களுக்கு வெளியிடப்படும் தேதியும் இன்று அறிவிக்கப்படலாம் என எதிர்பார்க்கப்படுகிறது.

அதன்படி, ஐஓஎஸ் 18, ஐபேடு ஓஎஸ் 18, மேக் ஓஎஸ் செகோயா, வாட்ச் ஓஎஸ் 10 மற்றும் டிவி ஓஎஸ் 17 ஆகிய சாஃப்ட்வேர் அப்டேட்களின் வெளியீட்டுத் தேதி இன்று அறிவிக்கப்படலாம்.

 

ஐபோன் 16 சீரிஸில் புதிய மாற்றங்கள்:

 

இன்று வெளியாகவிருக்கும் ஐபோன் 16 சீரிஸில் என்னென்ன மாற்றங்கள் செய்யப்படலாம் என இணையத்தில் பல்வேறு தகவல்கள் கசிந்திருக்கின்றன.

அதன்படி, 16 ப்ரோ மாடல்களில் பெரிய கேமரா, புதிய கேமார மாடியூல் மற்றும் முந்தைய மாடல்களை விட பெரிய திரை கொடுக்கப்படவிருக்கிறது. கேமரா செயல்பாட்டிற்காக ஆக்ஷன் பட்டனுடன், புதிதாக கேப்சர் பட்டன் ஒன்றையும் ப்ரோ மாடல்களில் ஆப்பிள் கொடுக்கவிருக்கிறதாம்.

16 மாடல்களில் 48MP+12MP டூயல் கேமரா செட்டப் கொடுக்கப்படவிருக்கிறது. முந்தைய மாடல்களிலிருந்து பெரிதாக எந்த மாற்றமும் இல்லை. 16 ப்ரோ மாடல்களில், 5x டெட்ராபிரிஸம் டெலிபோட்டோ லென்ஸ், 48MP முதன்மை கேமரா மற்றும் 48MP அல்ட்ராவைடு கேமரா கொடுக்கப்படலாம் எனத் தெரிகிறது. முந்தைய மாடல்களில் 12MP அல்ட்ராவைடு கேமராவே பயன்படுத்தப்பட்டிருந்தது.

புதிய ஐபோன் 16 மற்றும் 16 ப்ரோ மாடல்களில் AI வசதிகளுடன் கூடிய புதிய A18 பயானிக் சிப் கொடுக்கப்படவிருப்பது குறிப்பிடத்தக்கது.