Apple Mac: M4 சிப்பைக் கொண்ட புதிய மேக் மாடல்களை அடுத்த வாரம் வெளியிடுகிறது ஆப்பிள்

ஆப்பிள் நிறுவனமானது தங்களது மேக் லைன்அப்பில் குறிப்பிட்ட மாடல்களை மட்டும் M4 சிப்களைக் கொண்டு அப்டேட் செய்யவிருக்கிறது. இந்த சிப்களை

கடந்த மாதம் புதிய ஐபோன் 16 சீரிஸ் மற்றும் கடந்த அக்டோபர் 15ம் தேதி புதிய ஐபேடு மினி 7 ஆகியவற்றின் வெளியீட்டைத் தொடர்ந்து, அடுத்த வாரம் மேக் மாடல்களை அப்டேட் செய்வதற்கான அறிவிப்பை வெளியிட்டிருக்கிறது ஆப்பிள். இது குறித்த பதிவு ஒன்றை எக்ஸ் தளத்தில் பகிர்ந்திருக்கிறார் ஆப்பிளில் மூத்த துணைத் தலைவராக இருந்து வரும் க்ரெக் ஜோஸ்வியாக்.

ஆப்பிள் எந்த நிகழ்வை நடத்தினாலும், அது குறித்த அப்டேட்களை ஒரே நாளில் வழங்குவது வழக்கம். ஆனால் இந்த முறை அக்டோபர் 28ம் (திங்கள்கிழமை) தொடங்கி அடுத்த வாரம் முழுவதும் வரிசையாக புதிய மேக் மாடல்கள் குறித்த அப்டேட்களையும், புதிய மேக் மாடல்களையும் ஆப்பிள் அறிமுகப்படுத்தவிருப்பதாகத் தகவல்கள் வெளியாகியிருக்கின்றன.

தற்போது ஆப்பிளின் முந்தைய M3 சிப்களைக் கொண்ட மாடல்களே விற்பனையில் இருக்கின்றன. முன்னதாக இந்த M4 சிப்களை தங்களுடைய ஐபேடு மாடல்களில் அறிமுகப்படுத்தியதைத் தொடர்ந்து, தற்போது அதனைக் கொண்டு மேக் மாடல்களையும் அப்டேட் செய்யவிருக்கிறது ஆப்பிள். மேக் மாடல் என்றால் அனைத்து மேக் மாடல்களையும் அல்ல, குறிப்பிட்ட மேக் மாடல்கள் மட்டுமே.

மேக் லைன்அப்பில், மேக்புக் ஏர், மேக்புக் ப்ரோ, ஐமேக், மேக் மினி, மேக் ஸ்டூடியோ மற்றும் மேக் ப்ரோ என பல்வேறு வடிவங்களில், பல்வேறு வசதிகளுக்கு ஏற்ற வகையில் மேக் மாடல்களை விற்பனை செய்து வருகிறது ஆப்பிள். இந்த அனைத்து மாடல்களிலும் தற்போது M3 சிப்களே பயன்பாட்டில் இருக்கின்றன. அடுத்த வார அப்டேட்டில், மேக்புக் ப்ரோ, ஐமேக் மற்றும் மேக் மினி ஆகிய மூன்று மாடல்களை மட்டுமே அப்டேட் செய்யவிருக்கிறது ஆப்பிள்.

அதனைத் தொடர்ந்து அடுத்தாண்டு இடையில் மேக்புக் ஏர் மாடலையும், அடுத்தாண்டு இறுதிக்குள் மேக் ஸ்டூடியோ மற்றும் மேக் ப்ரோ மாடல்களையும் M4 சிப்களைக் கொண்டு ஆப்பிள் அப்டேட் செய்யும் என எதிர்பார்க்கப்படுகிறது.

புதிதாக M4 சிப்பைக் கொண்ட 14 இன்ச் மேக்புக் ப்ரோ, M4 ப்ரோ மற்றும் M4 மேக்ஸ் சிப்களைக் கொண்ட 14 இன்ச் மற்றும் 16 இன்ச் மேக்புக் ப்ரோ ஆகிய மாடல்களை நாம் எதிர்பார்க்கலாம். இது மட்டுமின்றி மேக் மினியில் M4 மற்றும் M4 ப்ரோ சிப்களைக் கொண்ட வேரியன்ட்கள் மற்றும் 24 இன்ச் ஐமேக்கில் புதிய M4 சிப்பைக் கொண்ட வேரியன்ட் ஆகியவற்றை நாம் எதிர்பார்க்கலாம்.

மேக்புக் ப்ரோ மற்றும் ஐமேக்கின் டிசைனில் எந்த மாற்றமும் இருக்காது என்றே தெரிகிறது. தற்போது இருக்கும் அதே டிசைனுடனே புதிய சிப்களைக் கொண்ட மேற்கூறிய மாடல்கள் வெளியாகும். ஆனால், மேக் மினி மாடலானது, முன்பை விட சிறியதாக வடிவில் வெளியாகும் எனத் தெரிகிறது. ஆப்பிள் டிவியின் அளவிலேயே புதிய மேக் மினி இருக்கும் எனத் தகவல் வெளியாகியிருப்பது குறிப்பிடத்தக்கது.

- Advertisement -